O Fondo Galego presenta en Cambre
un novo
conto para crear conciencia solidaria
- ‘Antía, Wamba e o regato pequeno’ é a proposta ideada pola compañía A
Tropa de Trapo para o Fondo Galego de Cooperación e Solidariedade
- O espectáculo xirará por vinte Concellos socios da entidade municipalista
e chega a Cambre arredor do Día Internacional para a Erradicación da Pobreza
A xira do novo espectáculo de contacontos deseñado pola compañía
A Tropa de Trapo para o Fondo Galego de Cooperación e Solidariedade continúa
mañá xoves en Cambre. Grazas ao apoio do Concello de Cambre, socio da entidade
municipalista e membro da Comisión Executiva a través da concelleira dona María
Jesús González Roel, alumnado do CEIP Wenceslao Fernández Flórez gozará e
aprenderá coa representación de ‘Antía, Wamba e o regato pequeno’, que comeza
ás 10.30 horas. A actividade encádrase na conmemoración do Día Internacional
para a Erradicación da Pobreza, que se celebra o 17 de outubro, e trátase
ademais dunha das múltiples propostas coas que o Fondo Galego está a celebrar o
seu 15º aniversario.
Marta Ortiz e Brais das Hortas volven apostar polas
historias con música en directo, desta volta dirixidas a un público infantil e
familiar. A obra está protagonizada por Antía, unha nena galega, e Wamba, un
mozo do Congo que se busca a vida vendendo de todo na rúa. Os contos del e as
merendas dela fundiranse nunha amizade que lle aprenderá a Antía que compartir
non é dar o que che sobra e que, como din na tribo de Wamba, o río énchese con
regatos pequenos.
O espectáculo xirará ata finais de ano por vinte Concellos socios do Fondo
Galego de Cooperación: Lousame, Ourense, Santiago de Compostela, A Coruña,
Cambre, Pontecesures, Mugardos, Oleiros, Lugo, Viveiro, Riotorto, Castroverde,
Samos, Sandiás, Manzaneda, Vigo, Pontevedra, Redondela, Gondomar e Covelo.
‘Antía, Wamba e o regato pequeno’ tómalle o relevo aos ‘Contos coas mas
abertas’, que desde 2010 percorreron un total de 61 escenarios de 48
Administracións socias do Fondo Galego, colleitando unha excelente acollida. O
novo espectáculo da Tropa de Trapo volve contemplarse no Plan de
Sensibilización, cofinanciado pola Xunta de Galicia.
O Fondo
Galego
O Fondo Galego de Cooperación e Solidariedade está
integrado por 92 Concellos e as Deputacións da Coruña e Lugo, que concentran a
través desta rede os seus esforzos no eido da cooperación ao desenvolvemento.
Garántese deste xeito unha xestión profesional e transparente, así como a
realización de proxectos con impacto nos países do Sur e a sensibilización da
sociedade galega a prol da solidariedade internacional. Desde a súa fundación
en 1997, o Fondo Galego ten desenvolvido 142 proxectos en 25 países e promove
numerosas actividades e materiais en relación aos desequilibrios Norte-Sur.
No hay comentarios:
Publicar un comentario